ফলার
ফলার বিভিন্ন বিষ্ণুপ্রিয়া মণিপুরি সামাজিক অনুষ্ঠানে ব্যবহার ইয়া আহের ।
ফলারর উপাদান:
চিড়া , কাবক , মুড়ি , কলা , দই বারো কাচা চানা ।
ফলার পুষ্টিকর বারো হুয়াত । ফলারর উপাদান এতার পুষ্টিগুণ বপ ।
ফলারর উপাদান এতার গারিগত কিতা কিতা উপকার করের
ক) দই
ফলারর দই পুষ্টিকর বারো স্বাস্থ্যকর খাবার আহান । সেঙকুমে ব্যাকটেরিয়া গাজনের মাধ্যমে দই তৈরি অর । উপমহাদেশে দইয়ের প্রচলন এহান পারস্য এহাত্ত আহিসে । কোম্পাগাত বিষ্ণুপ্রিয়া মণিপুরির সামাজিক অনুষ্ঠানে দইয়ের ব্যাবহার আরম্ভ ইছে এহান মাতানি হীন । যেতাউ অক দই এপাগা বিষ্ণুপ্রিয়া মণিপুরির সুস্বাদু খাবার আহান বারো ফলারর অন্যতম উপাদান আহান ।
এপাগা দইয়ের পুষ্টিগত বৈজ্ঞানিক বিশ্লেষণ আহান :
টেইপাঙ মানুর গারিগ কি
ব্যাকটেরিয়া এটাই সুস্থ থনা পারেরতা ? উত্তরহান পারের , বিষয় এহান নির্ভর করের কি ধরনর ব্যাকটেরিয়া এহার উপর । টেইপাঙ মানুর মধ্যে যেসারে হবা / হবানেই মানু আছি , ঠিক অসারে ব্যাকটেরিয়ার মধ্যে হবা / হবানেই ব্যাকটেরিয়া আছি ।
দইয়ের মধ্যে ল্যাক্টোবেসিলাস (Lactobacillus) বুলিয়া ব্যাকটেরিয়া আছে । এরে ব্যাকটেরিয়া এতা মানব দেহের কাজে উপকারী ।
বর্তমান চিকিৎসা বিজ্ঞানে প্রোবায়টিক (probiotic) বুলিয়া মেডিসিন আছে যেতা অনেক নোয়ারার আধুনিক হজক হিসাবে ব্যবহার অর । probiotic কিত্তাউ নাবে এতা জীবন্ত ব্যাকটেরিয়া (live microorganisms) । দইয়র মধ্যে যে ল্যাক্টোবেসিলাস আছে ঐ ল্যাক্টোবেসিলাস probiotic হজক এতার মধ্যে আছে ।
দইয়ের ল্যাক্টোবেসিলাস তেইপাঙ মানুর মধ্যে কি কি উপকার করের,
১. গারিগর রোগ প্রতিরোধ ক্ষমতা বৃদ্ধি করের ।
২. গারিগত প্রদাহ ( inflammation ) কমাদের ।
৩. পরিপাকে সাহায্য করের বারো ক্ষুদ্রান্তে পুষ্টিকর শোষণে সাহায্য করের ।
৪. নোয়ারা যেমন - Irritable bowel syndrome , invasive diarrhoea এতাত উপকারী ।
হুরকাং শৌসুমারারাঙত্ত অকরিয়া বুজন পর্যন্ত হাব্বি বয়সে দই উপকারী । অনেক মানুর lactose intolerance আছে । তাঙি সেঙকুম খেইলে বদহজম অর , ডায়ারিয়া অর । lactose intolerance আছি মানু অতা সেঙকুমর পরিবর্তে দই খেইলে কোন অসুবিধা নেই । ডায়রিয়া ইলে, বদহজম ইলে দই উপকারী ।
খ) কলা
কলা ফল এতা প্রায় হাব্বি গাঙে আছে । মণিপুরি বিষ্ণুপ্রিয়া সমাজে কলার গুরুত্ব নিয়াম । সামাজিক বারো ধর্মীয় অনুষ্ঠানে কলার ব্যাবহার বপ ।
কলার স্বাস্থ্যগত উপকারিতা
১. কলার মধ্যে পুষ্টিগুণ বপ । কলার মধ্যে আছে ভিটামিন , মিনারেল , পটাশিয়াম , ম্যাগনেশিয়াম , আইরন , ফলিক এসিড , রিবোফ্লাবিন ইত্যাদি । গারিগর পুষ্টি বারো রোগ প্রতিরোধর কাজে হবা ।
২. কলার মধ্যে ফাইবার বপকরে থার । ফাইবার পরিপাকে সাহায্য করের বারো কোষ্ঠকাঠিন্য থেইকরেদের ।
৩. কলার মধ্যে পটাশিয়াম বপকরে আছে । এহানে কলারে সুপার ফ্রুইট বুলতারা । পটাশিয়াম বপকরে থানার কারনে গারিগর উচ্চ রক্তচাপ কমাদের । ফাইবার বপকরে থানার কারনে গারিগর হবানেই কলেস্টেরল কমাদের । উচ্চ রক্তচাপ বারো হবানেই কলেস্টেরল কমাদিয়া হার্ট ডিজিজ বারো ব্রেইন স্ট্রোক কমাদের ।
৪. কলার মধ্যে আইরন বপকরে থার । রক্ত শূন্যতার নোয়ারা এনিমিয়া প্রতিরোধে পাংলাক করের ।
গ) চানা :
১. চানা বিশেষ করে জালা উঠের চানা ( sprouts ) । জালা চানা এতার মধ্যে কম ক্যালরি থার বারো বপকরে থার প্রোটিন , ভিটামিন , মিনারেল , ফাইবার , অ্যান্টি অক্সিডেন্ট বারো এসেন্সিয়াল ফ্যাটি এসিড । এতা গারিগর পুষ্টি যোগান দের বারো রোগ প্রতিরোধ করের ।
২. জালা উঠের চানা গারিগত হবানেই কলেস্টেরল কমাদের বারো হবা কলেস্টেরল বপকরেদের । অহানে হার্ট ডিজিজ বারো ব্রেইন স্ট্রোক কমাদের । গারিগর ক্যান্সার প্রতিরোধ করের , রক্তের সুগার কমাদের , পরিপাকে পাংলাক করের বারো কোষ্ঠকাঠিন্য থেইকরেদের ।
ঘ) কাবক , মুড়ি , চিড়া এতা কম ক্যালরি থার বারো গারিগত কানাপা ।
মণিপুরি বিষ্ণুপ্রিয়া সমাজে পুষ্টিগুণ বপ স্বাস্থ্যকর খাবার এহান নিয়মিত খানার কাজে উৎসাহিত করিক । আমার স্বাস্থ্যকর খাবার এহান্ন গর্ব করিক । আমার কৃষ্টি ক্যালচার রক্ষা করিক ।
লেখক
ডাঃ স্বপন কুমার সিংহ
মৌলভীবাজার, বাংলাদেশ।
0 Comment "ফলার-ডাঃ স্বপন কুমার সিংহ"
একটি মন্তব্য পোস্ট করুন