আমার মানুর স্বাস্থ্য
জিংতা অয়া থানারকা খারাং না খানারকা জিংতা অয়া থারাং – এহালো বিতর্ক করলে প্রথম পক্ষর বপ পেইতাঙাই শৈনেই। দ্বিতীয় পক্ষর মানু যে ছুপ নেই ওহান মাতে নুয়ারিয়ার। জাত আহান মানুরাং ইচ্ছামতো খানুয়ারলে জিংতা অয়া থায়া কিহান সারহান। খেইতে খেইতে পেটগো হাগেদে গেলেগাও যাকগা, গারিয়ে মুরে আকসাম ইলেউ অক- মানব জনম সফল নাইতেই খুশিমতো খানুয়ারলে। এহান বহিয়া আপাংপা বারো হবানেই চিন্তাহান । খাদ্য মূল উদ্দেশ্যহান ইলতা বলি পাংকাল ইয়া থানা। ঠিকমতো গারিগো বলানি বারো নুয়ারা পানি নায়া সুস্থ মনে কাম করানিরকা পরিমান মতো, পুষ্টিযুক্ত খাদ্য খানা দরকার। গারিগোর ওজন বারো পুষ্টি নিয়াম ইলেও হবা নেই ইলেও অসুবিধা। ইংরেজিনো Malnutrition বুলতে অপুষ্টি বারো অতিপুষ্টি দু হানিরেষ্ট বুঝার। গারিমোর পুষ্টিহান মাপানির সহজ পথহান ইলতা BMI বা বডি মাস ইনডেক্স (Body mass index) বি এম আই নিকালানির র্ফুমূলাহান ইলতাই এসারে,
গারিগোর ওজন হানরে কেজিৎ মাপিয়া উচ্চতার(মিটারে) বর্গ্ করিয়া ভাগ দিলে যে ফলহান নুকুলের উহানই BMI স্বাভাবিক BMI ইলতা ১৮৫ এত ২৫ অর মধ্যে BMI ২৫ অর গজে গেলেহা মাতরাং অতিপুষ্টি স্থূলতা বারো ১৮৫ অর তলে গেলেগা মাতরাং অপুষ্টি। খাদ্য, পুষ্টির বিষয়ে হাব্বিতা খানি জ্ঞান থানা দরকার। ভাত হিজানি, হৌ-পাত থৌরাং করানির ভার হুদ্দা জেলেইরাং এরাদিলে না চলতই। মুনিরতাও বিষয় এহাত মিল্লেঙ আহান দেনা লাগতই। কোন বয়সে কিজাত খাদ্য, কি পরিমান খানা লাগের ঔহান হারপানি থক। সৌ আগ জন্মর পর ৬ মাহা পর্যন্ত মানকর সেংকুমই তার হাবি পুষ্টি যোগান দেনারকা যথেষ্ট এমনকি ফোটা আহান পানিঅউ পিয়ানির দরকার নেই। ৬ মাস পরেত তার পুষ্টিরকা বুকের দুধর লগে নিয়াম খানি খাওয়ানি থক। পয়লাকা অকরতে পানি জাতীয় বা তরল বা নরম খানিত্ব আস্তে আম্তে শক্ত খানিত যানা থক। সময়মতো নরম বা শক্ত খানির অভ্যাস না করলে সৌ আকিগ চাবিয়া খানা হিকতারা। না চাবিয়া হাবি কুত কুত গিলানি চেইতারা। এছারে হারপিয়া পরিবার আহার হাপ্তা আহার মাথেল কিতা কিতা অনা থক অহান আগেত্ব ঠিক করানি হবা। হাপ্তাহাৎ কমপক্ষে ২-৩ দিন নিরামিষ খানা থক প্রতিদিনর খানার মাথেলে হৌ-পাত থানা লাগতই বারো প্রয়োজন মতো ফলও খানা থক। হৌ-পাত ফলে থার প্রয়োজনীয় ভিটামিন বারো এন্টি-অক্সিডেন্ট। গারিগোত বিপাক ক্রিয়ার কারনে হঙর কতক জাতর ফ্রি রেডিকেল বারো অক্সিজেন রেডিকেল। এতাই গারিগোর কোষ পর্দা বারো অন্যান্য অঙ্গর ক্ষতি করের। অতার কারনে গারিগো চালক ইয়া বুড়া অর বারো ক্যানসার অছারে হবানেই নুয়ারাত পরের। এর ক্ষতিকর ফ্রি রেডিকেলের আতেতো বাচাতে দরকার এন্টি অক্সিডেন্ট মলিকুল। ভিটামিন সি, ই, এ; জিংক এতা ইলতাই দরকারী এন্টি-অক্সিডেন্ট । অক্সিডেন্ট রেডিকেল বা ফ্রি রেডিকেল বনাম এন্টি-অক্সিডেন্টযুক্ত খাদ্য খানার কোন বিকল্প নেই। পুষ্টি বিজ্ঞানর লেরিক লেইসু চর্চা করলে হারপারাং আমার মানুর খানার মাথেল হাব্বিতো উৎকৃষ্ট। অনেক মানু এপাগা নিজর এতিহ্যগত হৌ পাত না খেয়া মিয়াঙর তৈলাক্ত, মসলাযুক্ত খানাত লই ইয়া মাছ বেলিয়া নাকরের খানি খানা অকরলা। পুষ্টি বিজ্ঞানীয়ে মাততারা গারিগোর প্রোটিনর অভাব দুর করানিরকা দুধ বা মাছ জাতীয় খাদ্য খানারকা। অন্যান্য প্রানীজ প্রোটিন যেমন মাছর লগে থার সম্পৃক্ত চর্বি-যেতাই গরিগোর কোলেস্টরল বাড়েয়া উচ্চ রক্ত চাপ, হার্ট্ এটাক, ব্রেইন স্ট্রোক এসারে নুয়ারার সৃষ্টি করের। গজে মাতলু নুয়ারা এতাত্ত রক্ষা পেইতে ইলে বপকরে মাছ খানা বারো শারিরীক পরিশ্রম, নেইলে ব্যায়াম করানির বিকল্প নেই। জিনিস দু-হান গারিগোত বপিয়া ক্ষতি করের চিনি বারো নুন।চিনি এতারে পশ্চিমা বিশ্বে মাততারা মাদা বিষ বা white poison চিনি এতা কম খানা বা না খানি ওহান বপিয়া হবা।নুন এতাউ গারিগোত বপিয়া ক্ষতি করের নিয়মর অতিরিক্ত খেয়লে।মি শৈনেই মাতে পারুরি আমার সমাজে নুনর চাঙহান আর আর সমাজরাংতো বহেছে। যে সমাজে বারো ঘরে নুনর চাঙহান যত কমিত ঔ সমাজে বা ঘরে উচ্চ রক্ত চাপর নুয়ারাত পরানি ততই কম থাইতই।
এটা হাবি খাল করিয়া মাতানি পাররাং মনিপুরী খানার মাথেল পৃথিবীর মাঝে সর্বোৎকৃষ্ট।নিজর মাথেল খেইক, মানুরতা খানার অভ্যাস বেলিক। অতা ইলেই মন সুষ্ট ইয়া থাইতাঙাই।
লেখক
ডাঃ আশুতোষ সিংহ
তিলকপুর, কমলগঞ্জ, বাংলাদেশ।
0 Comment "আমার মানুর স্বাস্থ্য-ডাঃ আশুতোষ সিংহ"
একটি মন্তব্য পোস্ট করুন