মণিপুরী ধর্ম-সংস্কৃতিত শৈবভাবনার প্রভাব
মালেম এহানর সনাতন ধর্মর অনুসারী হাবিয়ে মাহাদেব গিরকরে নিঙকরতারা, তার জনপ্রিয় নাঙ আহান ‘শিব’ ! গিরকর লিশিং আহান নাঙ আসেতা “শিবসহস্রনাম” স্তোত্রে ! মহান্যাসে মাহাদেবর দশ লিশিং নাঙ আসে বুলিয়াও য়ামপারা গিরিগীথনীয়ে দাবী করতারা ! ঋকবেদে মাহাদেবর নাঙে কুন শোলক(মাই-মন্ত্র)নেই, তবে বৈদিক ‘রুদ্র’ বারো মাহাদেব গিরক আকগ বুলিয়াও নিঙকরতারা ! সংস্কৃত ‘শিব’ ওয়াই এগ হুদ্দা বৈদিক রুদ্র নাগই আরাকও বৈদিক দৌলিশিং-দৌলাহার অভিধা হিসাবে ব্যবহৃত অসে !এ বিষয় এহানল খাল করলে ‘শিব’ ওয়াই এগ বিশেষণ আহান বুলিয়া নিঙে অর,ওয়াই এগর অর্থ ‘শুভ’ ‘দয়ালু’ বারো ‘মহত্’! আফগানিস্থানেত্ত অ’করিয়া ভিয়েতনাম পেয়া, বারো তিব্বতেত্ত শ্রীলঙ্কা পেয়া মহাদেব গিরকর চিহ্ন আসে; উত্তর-পূর্ব ভারতর মণিপুরেও থাইতই উহান আওঅইপা হান ! উহানে মণিপুরীর((বিষ্ণুপ্রিয়া/মেইতেই)ধর্ম-সংস্কৃতির বারো লোক-সংস্কৃতির গজে মাহদেব বা শিব ভাবনা জবর ডাটয়া পরেসে !
গৌড়ীয় মেইতেই বারো বিষ্ণুপ্রিয়া মণিপুরী রাধা-কৃষ্ণাশ্রিত ভক্তিবাদ ইলয়া থাইলেও মহাদেব গিরক মণিপুরীর (বিষ্ণুপ্রিয়া/ মেইতেই) ধর্ম-সংস্কৃতির লগে জবর লুয়া নাপয়া আসে ! মণিপুরী সংস্কৃতির পাপ হান লেহে মাহাদেব গিরকর উপস্থিতি তঙাল করে খাল করানি থকসে ! এরে পরি(নিবন্ধ) এগ মণিপুরীয়ে মূর্তিপাল করতারা কর্ম-কাসাত মাহাদেব কেন্দ্রিকতার লিম, মাহাদেব ভাবনা য়ৌঅসে লৌকিক বারো ধর্মীয় কর্ম-কাসা !
মণিপুরী সংস্কৃত হানরে গজর থাকে কাহ্ করে দেসে কুমেই হান রাসলীলা, এহানর মাহদেব কেন্দ্রিকতা সম্পর্কে পুষারাকপা ওয়ারী আহান -–“বৃন্দাবনে শ্রীকৃষ্ণ ব্রজগোপী সহ রাথা গিথানকর রাসনৃত্য করল উবাকা মাহাদেব গিরক থঙচিল হান পাহারা দিয়া থাইল ! কিতা পারা দিন গিরকও রাসলীলাত য়ৌ-অনি মনেইল;-- কিন্তু কৃষ্ণর য়াথাঙ নেই I খাল করতে-খাল করতে পথ আগ নিকালল – ব্রজগোপীর বেশ লয়া রাস হানাত চরেদে হমেইল ! গোপীর হাদিত হমেয়া মাহাদেব গিরক নাসের এহান কৃষ্ণই দেখল, জবর নুঙেই নাপেয়া রাস হানাত্ত নিকালা দিল ! লাজে-দুকখে মাহাদেব গিরক নিজে রাস আহান করানিত লেপইল – কিন্তু রাস করানির মত উপযুক্ত ফাম না’পার! রাসর ফাম আহান বিসারতে-বিসারতে মণিপুরে ফৌঅইলহা !লোকতাকগর পারগত রাসলীলা করানিত লেপইল ! কিন্তু দেহেরতা পুল্লাপ মণিপুর হান আফায় পানিয়ে চপক বুরেসে ! ত্রিশুলগল মহেন্দ্র পর্বতগর এমুরেত্ত হৌমুর লিতফৌ করিয়া সুরুঙ আগ হঙকরিয়া পানি নিকুলানিরকা ব্যবস্থা করল ! পানি কমইলে মাহাদেব-দূর্গা রাধা-কৃষ্ণর বেশ ধরিয়া রাসলীলা মূর্তি-পালকরলা, হাত-রাতি হাবি নাসলা ! ইমাম আধারর লাম উহান উবাকা স্বর্পরাজ অনন্ত গিরকে মণিগল ইঙাল-ঙাল করেইল; আট্টিঙ্গাত থায়া দৌলিশিং-দৌলাহা হাবিয়ে মাহাদেব-দূর্গার রাসলীলা দেখলা ! উবাকাত্ত লাম এহান ‘মণিপুর’ নাঙে পালইল !”---- মাহাদেব সম্পর্কিত মণিপুরর পৌরাণিক ওয়ারী আহান এহান !
মাহাদেব-ভাবনা য়ৌ’অসে মণিপুরর থাইনাকার লেরিক আহান “খুমল পুরাণ”,--লাম উহানাত (মণিপুরে)রাধা-কৃষ্ণাশ্রিত ভক্তিবাদ হব্বে সিতারনির মাতামে লেংকরলেও লেরিক উহানর বিষয় বস্তু বারো ওয়ারী-পরি প্রাক বৈষ্ণব যুগরতা ! লেরিক উহানর গ্রন্থাকার গিরকে অ’করাগত বন্দনা হান রাধা-কৃষ্ণর নাঙ লইলেও তঙাল করে ‘হর-গৌরী(শিব-পার্বতী)রে হমা দেসে; বারো মাহাদেবর য়াথাঙে ইকরানি অকরলু বুলিয়া মতেসে, বারো নিজরে মাহাদেবর ভক্ত হিসাবে পরিচয় দিয়াসে ! লেরিক এহান খুমল-রাজবংশর ইতিহাস হান বুলিয়া দাবী করেসি !খুমল রাজা ‘দাত্তমুনি’ বিষ্ণু-নিংকরানির সালে মহামন্ত্রী ফৈজু মহেন্দ্র গিরকরাঙ রাজ্য-শাসনর ভার দিয়া বনবাসে গিয়াসিলগা ! বনে মাহাদেব উপাসনা করিয়া আসিলি বেয়াপা আগর লগে উনা অসিল—উগর নাঙ ‘যুতেশ্বরী’, দ্বিয়গই উপেইত গর-জিনা পাতেসিলা ! সৌ’আগ জরম অনার পরে বন হানাত বেলাদিয়া মালক-বাপক নিজর-নিজর উপাস্য দৌ নিঙকরাত গেলাগা ! উবাকা মাহাদেব গিরক স্বয়ং সৌ’গ য়ক্করিয়া ডাঙর করল, সাধন-ভজন হিকেইল !নাঙ হান ‘লিকলাইখম্বা’ (লিকলিক করের বুলিয়া খুয়ার পানিরে(শিশির ) আগেদে ‘লিকলাই’ মাতেসি বারো লিকলিকা খুয়ার পানি খম করিয়া পিল বুলিয়া ‘লিকলাইখম্বা’ নাঙ পাসেতা)!এগদে মহামন্ত্রী ফৈজুমহেন্দ্র গিরকে সিংহাসন হান কা’ল করিয়া থাইল, তাও নিঙলসৌ আগ পেইল, নাঙ হান ‘সাবিরেই পান্থইবী’ !নিঙলসৌ এগরতা কনাকেত্ত দৌ’র উগদে মন হান !মাহাদেব গিরক আকদিন তেইরে হপনেদে মাতলতা যে, উতা-পারা বন উহানাত লিকলাইখম্বা বিষ্ণু নিঙকরিয়া আসে, উগই তেইর হেয়কগ অইতই বারো লাম এহানর রাজাগ পালইতই! নিঙলসৌ এগ লুহঙর লাক অইলী উবাকা ফৈজু মহেন্দ্র গিরকে তেইর লগে চুনা অইব দামান বিসারানি অ’করল, কিন্তু মাহাদেব গিরকে হপনেদে দেহাসিল উহান নিঙশিং অয়া বাপকর কুন প্রস্তাব আহান নাও য়াকরল ! লিকলাইখম্বা গিরক রাঙ গর পাতানির ওয়াশাক করেসে—এহান বাগেইল ! লিত্অনি নারিয়া বাপকে তেই মনাসে গিরক এগরাঙ লুহঙ দিয়া বনে দিয়া বেঠাইল ! পরবর্তী সমেয়ত্ প্রভু বিষ্ণুয়ে চাল করিয়া লিকলাইখম্বা লাম উহানর রাজাগ পালইল ! তানুর বংশাবলী খুমল লেইপাকর রাজা পালয়া থাইলা !
মেইতেইএ লেরিক এহান না য়াকরতারা, বারো বিষ্ণুপ্রিয়া মণিপুরী অংশ আহানেও নাও য়াকরতরা ! মিও এহান চুমপা ইতিহাস হান বুলিয়া না’মাতুরি ! তবে বিভিন্ন ইতিহাসবিদে এহান খৃষ্টীয় অষ্টাদশ শতাব্দীর পইলাদে লেঙকরেসি লেরিক হান বুলিয়া লেপ করেসি ! পুরাণ এতার ঐতিহাসিক সত্যতা সম্পর্কে য়ামপারা প্রশ্ন থায়া অওনা,-- এতা ইতিহাস নাগই ! কিন্তু এতাত ইতিহাসর লিম থার ! নির্দিষ্ট পুরাণ আহান লেঙকরেসি ফাম(place), বারো খেলতাম(period) সম্পর্কে চুমপা সিদ্ধান্তত্ লেপনি পারলে অও হাকতাকে লাম উহানর টেইপাঙ মানুর ধর্ম-ভাবনা, সংস্কৃতি, জীবন-যাত্রা, ভাষা-সাহিত্য, আর্থ-সামাজিক অবস্থা সম্পর্কে চুমপা সিদ্ধান্ত আহানাত ফৌ’অনি য়াকরের !
হান্তে ‘খুমল পুরাণ’ এহান মণিপুরে রাধা-কৃষ্ণাশ্রিত ভক্তিবাদ হমানির মাপাদে লেঙকরলেও ওয়ারী-পরি উতা লাম উহানর আরাকও আগেকার পুষারাকপা লোককাহিনী ইলয়া ইকরেসি হান ! তার মানে মণিপুরে রাধা-কৃষ্ণাশ্রিত ভক্তিবাদ সিতারনির আরাকও আগেত্ত উপেইত্(মণিপুরে)বিষ্ণু বারো মাহাদেব উপাসনা প্রচলিত অসিল !বারো বিষ্ণু উপাসক ‘দাত্তমুনি’, শিব উপাসক ‘যুতেশ্বরী’ দ্বিগয় গর-জিনা পাতানির ওয়ারী হানে প্রমাণিত অর বিষ্ণু উপাসক দাপা বারো শিব উপাসক দাপার'মা বৈবাহিক সম্পর্ক আসিল ! ‘ফৈজু)মহেন্দ্র’ ‘যুতেশ্বরী’ ‘দাত্তমুনি’ এতা সংস্কৃত তত্সম ওয়াই (শব্দ),বারো নিঙে অর ‘লিকলাইখম্বা’ ‘সাবিরেই’ এতাও ভারতীয় প্রাকৃত(Indu-Aryan) ওয়াই ! ‘লিকলাইখম্বা’ ওয়াই এগ সম্পর্কে গজেও ওয়ারী-পরি দেসু, ‘সাবিরেই’ ওয়াইএগ সম্ভবত সংস্কৃত ‘সাবিত্রৈ’ শব্দ অপভ্রংশগ (‘সাবিত্রৈ’=সূর্য্যসম্বন্ধী)! তা-থকয়া আমি লেপনি পারিয়ার যে ভক্তিবাদ হমানির আগেত্ত মণিপুরে প্রাকৃত ভাষী(Indu-Aryan speaker) ‘বৈষ্ণব’ বারো ‘শৈব’ ধর্ম অনুসারী রাজা পালয়া আসিলা ! ওয়ারি এহানর ‘মাহাদেব’ বারো ‘বিষ্ণু’ কেন্দ্রিকতা থাইনাকার(প্রাচীন) মণিপুরর ‘শৈবভাবনা’ বারো ‘বিষ্ণু উপাসনা’র লিম পেয়ার !
1464 খ্রিষ্টাব্দে বিষ্ণুপুরে লিংখাত করেসি ভগবান বিষ্ণুর লেইসাঙ উগ থাইনাকার দিনে বিষ্ণু উপাসনার আওইপা স্থাপত্য নিদর্শন হান ! বারো 721 শকাব্দর(799খৃষ্টাব্দ) পিতারেই থাপাক(তাম্র লিপি)আহানও ‘ফায়েঙ’ বুলতারা গাঙেত্ত আবিস্কৃত অসে ! ‘শ্রী’ ‘পুরাণ’ ‘শিব’ ‘দেবী’ ‘নির্বংশ’ ‘কুল’ ‘পুষ্প’ ‘মাণিক’ ‘গণেশ’ ‘রসায়ন’ ‘বিশ্বকর্মা’ ‘ধর্ম’ এসাদে সংস্কৃত ওয়াই-সম্বলিত(শব্দ-সম্বলিত) পিতারেই থাপাক হান ! মণিপুরে 1935 খ্রিষ্টাব্দে আবিষ্কৃত অসে থাপাক এহান বাদে য়ামপারা প্রাচীন মূর্তিও উদ্ধার অসে(তবে য়ুমজাউ সিংহ সহ দাপা আহানর মতে পিতারেইর থাপাক এহান অমাটিক পুরানা হান নাইতই, আরাক দাপা আহানে বারো খৃষ্টীয় অষ্টম শতাব্দীর হান বুলিয়া দাবী করতারা !রসায়নিক পরীক্ষা-নিরীক্ষার করিয়া চুমপা খেলতাম হান হারপানির সুযোগ নেই ! থাপাক উহান লেইমাঙ অসে!)!
মণিপুরর প্রাচীন মূর্তি-শিল্প সম্পর্কে ওয়ারি-পরি দিতেগা L. Kunjeswori Debi গিথানকে মতেসেতা –“The icons of Manipur mainly belong to Saiva, Sakti and Vaishnava sect of Hindusim. Apart from it some icons of Buddhist pantheons to the period extending from 11th to 19th A.D. হানতে পৌরাণিক পুষারাকপা ওয়ারিত হুদা নাগই মণিপুরে প্রাচীন কালেত্ত বিষ্ণু উপাসনা বারো শৈবভাবনার স্থাপত্য বারো প্রত্ন নিদর্শন আসে !
খৃষ্টীয় অষ্টাদশ শতাব্দীর পইলাদে(1714 A॰D॰ মতান্তরে 1724 A॰D॰) পামহৈবার নেতৃত্বে মণিপুরর য়ামপারা মানু শান্তদাস বাবাজীরাঙ লেইমুঙ লয়া রাম-সীতা কেন্দ্রীক ভক্তিবাদ ‘রামান্দী ধর্মে’ ইলইলা, উবাকা প্রাকৃত ভাষী( Indu-Aryan speaker) দাপা আহান খুমল রাজাই চিন করিয়া রামান্দী ধর্ম লনা না’করেসিলা ! উবাকা তানু নিজরে ‘বিষ্ণু উপাসক’ বুলিয়া পরিচয় দিয়াসিলা ; উহানাত শান্তদাস বাবাজীয়ে তানুরে বিষ্ণু মন্ত্রে দীক্ষা দিয়া ‘বিষ্ণুপ্রিয়া’(বৈষ্ণবগণ)বিশেষণ এহান দিল ! পরবর্তী হাকতাকে ভাগ্যচন্দ্র(জয় সিংহ)মণিপুরর সিংহাসনে কাইল(1763-1798)বারো গৌড়ীয় বৈষ্ণবধর্ম গ্রহণ করল !এহানেই মণিপুরর রাষ্ট্রধর্ম হান লেপইল – মেইতেইর ডাঙর অংশ হানেই গৌড়ীয় বৈষ্ণবধর্ম লইলা ! কিন্তু উবাকাও বিষ্ণুপুরর খুমল রাজা বারো তার অনুগামী প্রাকৃত ভাষী(Indu-Aryan speaker)দাপা এহান পইলাদে গৌড়ীয় বৈষ্ণব ধর্ম লনা না’করেসিলা ! সম্ভবত একারণেই মণিপুর রাজা লকেয়ে হকতাক আহানাত বিষ্ণুপ্রিয়ারে বামুন থীঙ করিয়া থসিলা ! রাষ্ট্রীয় চাপে পরিয়া পরবর্তী হাকতাকে বিষ্ণুপ্রিয়াও গৌড়ধর্ম গ্রহণ করেসি ! উহানে মেইতেয়ে বিষ্ণুপ্রিয়ার আগে গৌড়ীয় বৈষ্ণবধর্ম লসি বুলিয়া দাবী করতারাতা !
এবাকা প্রশ্ন হান নিজরে বৈষ্ণব বুলিয়া পরিচয় দিয়া রাধা-কৃষ্ণাশ্রিত গৌড়ীয় বৈষ্ণবধর্ম লনা না’করলা উতা কিসাদে বৈষ্ণব? কুঙ দৌগ কিসাদে উপাসনা করলাতা? এহানর উত্তর পেইতে অইলে শান্তদাস বাবাজী-রাঙত বিষ্ণুপ্রিয়া নাঙ পানার আগে এতা কি কি নাঙে পরিচিত অসিলা বারো নাঙ উতার ব্যুত্পত্তি গত অর্থ হারপানিনি থকর ! রাম-সীতা কেন্দ্রীক ভক্তিবাদ ‘রামান্দী ধর্মে’ লেইমুঙ লইতে মেইতেইয়ে ‘নুঙখ্রাঙ-ইরুপ্পা’(মুর খুরেয়া নুঙখ্রাঙ পহুরীগত জাবুরিয়া প্রায়শ্চিত্ত করেসি উহান ‘নুঙখ্রাঙ-ইরুপ্পা’)করেসিলা ! কিন্তু বিষ্ণুপ্রিয়া শান্তদাস বাবাজী রাঙ লেইমুঙ(বিষ্ণু মন্ত্রে দীক্ষা)লইতেও ‘নুঙখ্রাঙ-ইরুপ্পা’ না’করেসিলা বারো পরবর্তী হাকতাকে গৌড়ীয় বৈষ্ণবধর্ম লইতেও মুর না’খুরাসিলা ! এহানরকাই আগেদে মেইতেইয়ের অংশ আহানে বিষ্ণুপ্রিয়ার লগে পাড়েঙে বয়া দৌ’র প্রসাদ না’লককরলা, বারো ‘মায়াঙ কালাছা’ বুলিয়া মাতলা!বিষ্ণুপ্রিয়াই মেইতেইরে ‘আকোকছা’ বুললা;( কোক’=মস্তক, আকোক=মুন্ডিত মস্তক, ছা=সন্তান হানতে ‘আকোকসা’=মুর খুরাসি উতার সৌ!)! মণিপুরর প্রাকৃত ভাষী( Indu-Aryan speaker)উতা দুহান নাঙে চিহ্নিত অসি 1) কালাছা,2) মায়াঙ!
1) ‘কালাছা’ মেইতেই বিষ্ণুপ্রিয়া মণিপুরীরে মাততারা ওয়াইগ, বার্মিজ ঠারেত্ত আহেসে নাঙ হান ! বার্মিজ ঠারে ‘কালা’ মানে অভিজাত ভারতীয়, মূলত প্রাকৃত ভাষী(Indu-Aryan speaker) ভারতীয় বুজার ! ভগবান বুদ্ধ নিজেই প্রাকৃত ভাষীগ উহানে হাবি প্রাকৃত ভাষী ভারতীয়রে বার্মীজে মাততারা ওয়াইগ ! U Khin Maung Saw গিরকর মতে পালি ‘কুল পুত্ত’(সংস্কৃত-‘কুল পুত্র’) র সামপা ওয়াইগ ‘কালা’! ভারতীয় হিন্দু,বৌদ্ধ,বৈষ্ণব,শৈব, মুসলমান হাবিরে ‘কালা’ বুলিয়া মতেসি ! প্রাচীন কালে খৃষ্টীয় একাদশ-দ্বাদশ শতাব্দী পেয়া বর্তমান মণিপুরর দক্ষিণ-পূর্ব লাকতেইগত ‘Patteikkaya’ নাঙে প্রাকৃত-ভাষী অধ্যুষিত রাজ্য আহান আসিল, ভারতীয় প্রাকৃত ভাষী(Indu-Aryan speaker)রাজবংশ শাসিত রাজ্যহান ! পাগানরাজ ‘অনুয়ার্থ’র হাকতাকে পাগানর করদ রাজ্য হান অয়া আসিল ! বার্মীজে উতারেই ‘কালা’ মাতেসি, এরে ভারতীয় রাজ্য এহানর রাজা উগরেই ‘কালারাজা’ মাতেসি পাউঋ ! W॰ Ibulhol Singh গিরকর মতেও ‘কালারাজা’ নির্দ্দিষ্ট কুন রাজা আগর নাঙ হান নাগই, কালা বা ভারতীয় প্রাকৃত ভাষী(Indu-Aryan speaker)র রাজ্য উহানর শাসক উগই ‘কালারাজা’! উহানে মেইতেইও লাম উহানর প্রাকৃতভাষীরে( Indu-Aryan speaker) ‘কালাছা’ মাতেসিতা; সম্ভবত বার্মীজেত্ত মেইতেই ঠারে হমাসে ওয়াইগ ! ‘কালা+ ছা’=কালাছা, মেইতেই ‘ছা’র শব্দর অর্থ ‘সন্তান’,--‘কালাগী মাছা’=কালাছা মানে ভারতীয় Indu-Aryan speaker,র বংশধর ! বাংলা ঠারেও ‘ছাও’ ‘ছাওয়াল’ মাততারা –মূলত সংস্কৃত ‘বত্স’->বাছা -> ছাও; এসাদে হঙসে ওয়াইগ, হানতে মেইতেই ‘ছা’ এগও সাংস্কৃত জাত ওয়াইগ !(*** ‘কালাছা’ ওয়াই ব্যুত্পত্তি বিশ্লেষণ করিয়া য়ামপারা দেশী-বিদেশী অজারেলে তঙাল-তঙাল মত ব্যক্ত করেসি ! উতাল আলোচনা করলে পরি এগ য়াম চাঙখল অইতই –উহানে হাবি উল্লেখ না’করলু মি,হুদ্দা মর মত উহানই এপেইত ব্যক্ত করলু!)হানতে ‘কালাছা’ এগ মণিপুরর Iandu-Aryan speaker উতারে মাতেসি ওয়াইগ !
2) ‘মায়াঙ’ ওয়াই এগ সৃষ্টি আসেতা সংস্কৃত ‘মায়া’+‘অঙ(অঙ্গ)’,= মায়াঙ ! ‘মায়া’ মানে ‘জাদু’, অঙ(অঙ্গ) মানে ‘দেহ’, হানতে নিঙে অর ‘মায়াঙ’ ওয়াই(শব্দ)এগ মায়/ মাই/ মাহী বা জাদু মন্ত্রে বিশ্বাসী বা চর্চা করতারা দাপা আহান! সম্ভবত তান্ত্রিকতাময় শৈব ধর্ম অনুসারী !মায়া বা কালা জাদু(Black Magic)এহান তান্ত্রিকতাময় মাতৃ উপাসনার উগদেও ইঙ্গিত করের যেহানর লগে শৈবধারনা নাপয়া থার!বিষ্ণুপ্রিয়া মণিপুরীয়ে ‘গর-গিথানী’রে এবাকাও নিঙকরতরা, উহান আদিম মাতৃ উপাসনার নিদর্শন হান ! ‘মাহী’ এগ মন্ত্রর প্রতি শব্দ হিসাবে মেইতেই বারো বিষ্ণুপ্রিয়া ঠারে ব্যবহৃত অর, ওয়াই এগ আহেসেতা মায়/মাই শব্দত্ত, মূল গুড়িগ ‘মায়া’ ! মাই-মন্ত্রল সল দিয়া নুয়ারার চিকিত্সা, করতরা, ঠিক চেইতারা, বাটি চালান-কিতা করতরা উসাদে উতারে বিষ্ণুপ্রিয়া ঠারে ‘মেইপা’(পুং) মেইপী(স্ত্রী), বারো মেইতেই ঠারে ‘মাইবা’ ‘মাইবি’ মাততারা, মাই বা মন্ত্র’র লগে ‘পা’ ‘পী’ বারো ‘বা’ ‘বী’ প্রত্যয় য়ৌ’অয়া সৃষ্টি অসে ওয়াই(‘পা’ ‘পী’ বারো ‘বা’ ‘বী’ সম্ভবত পালি প্রত্যয়)! হানতে মেইপা/মেইপী ওয়াইর গুড়িগও সংস্কৃত ‘মায়া’! মাতৃ(চিহ্ন) উপাসনা উহান শিব বা মাহাদেব সম্পর্কিত হান – হানতে উহানও ‘শৈব’! (***উহানে ‘মিয়াঙ’ বারো ‘মায়াঙ’ তঙাল)! এসাদে ওয়ারি-পরিয়ে নিঙে অর মণিপুরর থাইনাকার মায়াঙর ধর্ম সংস্কৃতির গজে ‘শৈবধর্মর প্রভাব বপসিল ! বার্মীজে যেতারে ‘কালা’ বুলেসি উতারেই মেইতেইয়ে ‘কালাছা’, ‘মায়াঙ’ এরে নাঙ দ্বিয় হান মাতেসিতা, অনেক সময় নাঙ দ্বিয় হান সামদিয়া ‘মায়াঙ কালাছা’ মাততারা !‘মায়াঙ’ এহান নির্দিষ্ট সংস্কৃতি অর্থাত্ আদিম জাদু বিশ্বাসী সংস্কৃতির বাহক বুলিয়া মাতেসি নাঙ হান !
পরি মুল আলোচ্য বিষয় হান মণিপুরী ধর্ম-সংস্কৃতির গজে শৈব-ভাবনার প্রভাব – আগেদে দিলু ওয়ারি-পরিত অনুমান করানি পারিয়ার যে, মণিপুরর থাইনাকার প্রাকৃত ভাষী Indu-Aryan speaker) শৈবভাবনা বারো বিষ্ণু কেন্দ্রীক ধ্যান-ধারণাই প্রভাবিত আসিলা, উহানে পইলাদে রামান্দি ধর্ম বারো গৌড়ীয় বৈষ্ণবধর্ম গ্রহণ করানি না’করেসিলাতা পাউরি ! মণিপুরর থাইনাকার শৈব ধর্মর ওয়ারী-পরি দিতেগা `W॰ Ibohal Singh গিরকর বিশ্লেষণ উহানর ঐতিহাসিক সত্যতা উপনি পারিয়ার –গিরকে মাতেসেতা –“........As discussed in earlier section the shrine of Siva near Khalong on the top of the Nongmaiching hills was installed by the Combodian tribes. At about 1225A.D. another fresh wave of Saivism and also followers of Vishnu cult came to this land.This purer form of Saivism had renovated the earlier debased Saivsim became a very popular religion. The religion was not brought by any missionary but brought by the Bangals and proto Bangals॰...............It is most probable that there were some scholars and religious philosophers in the court of the Bangal principality of Lamangdong”॰ (** মণিপুরর থাইনাকার প্রাকৃত ভাষী উতারে মেইতেইর অংশ আহানে হামেচা বাঙ্গালী বুলিয়া লেপকরানির হত্নাি করতারা, W॰ Ibohal Singh গিরকও অও তৌরি উগত্ত নিকুলানি না’রেসে; উহানে বিষ্ণুপুররেও Lamangdong বুলেসে বারো উপেইর বাসিন্দা উতারে বাঙ্গালী বুলিয়া মতেসেতা; কিন্তু একাদশ-দ্বাদশ শতাব্দীত্ হাবি নব্য ভারতীয় প্রাকৃত ঠার হব্বে বর্তমান রূপ পার মাপা হান ! উহানে ভাষা ভিত্তিক জাতি ব্যবস্থা উবাকা নেয়সিল, হানতে 'বাঙ্গালি' নাঙে কুন ভাষিক গোষ্ঠী চিহ্নিত অনার সম্ভাবনা নেই ! উহানে খৃষ্টীয় দ্বাদশ-ত্রয়োদশ শতাব্দীর মাপাদে বিষ্ণুপুর/ Lamangdongর প্রাকৃতভাষীর ( Indu-Aryan speaker)রাজ্য হান বুলেসে উহান বাঙ্গালির হান নাগই --মণিপুরর প্রাকৃত ভাষী রাজ্য হান )!
বারো শান্তদাস বাবাজীর য়াথাঙে পামহৈবা রাজাই মেইতেই মেয়েকর আদিম ‘সেনামাহী ধর্ম’র লেরিক-লেইশৌ জ্বী-দিয়া ধ্বংস করেসে বুলিয়া মেইতেই-র দাবী উহান সম্পর্কে W॰ Ibohal Singh গিরকে সন্দেহ প্রকাশ করেসে, মূলত শৈবধর্ম সংক্রান্ত প্রাকৃতভাষীর লেরিক ধ্বংস করে থাইবা বুলিয়া মাতেসে--”...All such records on genealogy describing non-Mongoliod origin had possibly been destroyed during the period of Pamheiba on the instigation of Shantidas Gosai a religious preacher from eastern Bengal who introduced Ramandi Dharma a Hindu sect in Manipur. Not only Chingurembi (‘চিঙগুরেম্বী’ বিষ্ণুপুরর মায়াঙ রাজা/কালারাজার নিঙলগ মেইতেই কিংবদন্তি অনুযায়ী মেইতেই পতি নৌথীঙখঙ’র পাটরানীগ ! বারো ‘নৌথীঙখঙ’ 1215 A.D.ত 1250A॰D পেয়া রাজা পালসিল মেইতেইর রাজাগ ! )but all record dealing with Bangals had been destroyed. So we have lost practically all records covering this area(মায়াঙ/ কালাছা অধ্যুষিত বিষ্ণুপুর রাজ্য হান-- এহানরে মেইতেইয়ে Lamandang মাততারতা !). Shantidas was probably an opponent of Saivism are also believed to have been destroyed.”!রাধা-কৃষ্ণাশ্রিত গৌড়ীয় বৈষ্ণবধর্ম মূল ভারতে বলি-পাংকাল অইলতা শ্রীচৈতন্য উদয়র পরে, অর্থাত্ ষোড়শ শতাব্দীর মাপাদে ! হানতে ঔ হাকতাকে বা উতার আগে ভারতর মুঙর লাক্তেইগর মণিপুরর প্রকৃতভাষীয়ে যে বৈষ্ণবধর্ম হান পালন করেসি উহান ‘শৈব-ভাবনার আধারে বিষ্ণু উপাসনা হান বুলিয়া নিঙে অর ! কারণ আদি কালেত্ত অ’করিয়া প্রাক মধ্যযুগ পেয়া বার্মা বারো দক্ষিণ-পূর্ব এশিয়াদে বিষ্ণু বারো শিব উপাসনার অস্তিত্ব আসিল ! এসম্পর্কে Myint Myint San গিরকর মন্তব্য আহান দেওরি –“Myanmar in history had its culture Indinized. The assential elements of Hindu culture were absorbed by the peoples as the kingdoms,both big and small, were being established throughout the region. The Indianization most probably took in the 2nd century B.C. and it can even date further back, from time the land of Myanmar was peopled by the Puy in the Ayeyarwady(ইরাবতী) valley by the Mon in Lower Myanmar. The Brahmanism that came to Myanmar was represented by the two imported sects – Sivaism and Vaishnavism.”--এসাদে তথ্য ইলয়া হার পেয়ার যে অতি প্রাচীন কালেত্ত বার্মার বিভিন্ন অঞ্চলে বৌদ্ধধর্ম সিতারানির আগেই ব্রাম্মন্যবাদ, বৈষ্ণববাদ বারো শৈবধর্ম সিতারাসিল !
নিঙে অর মণিপুর লাম এহান প্রাচীন কালে ভৌগলিক কারণে মূল আর্যাবর্তত্ত খেইয়য়া থানার কারণে আর্যাবর্তে ধর্মীয় বিবর্তনর হুতগ মণিপুরে খানি ডিলয়া বারো তঙাল অয়া ফৌ’অইলগা ! উতা বাদে বার্মা বারো দক্ষিণ-পূর্ব এশিয়ার লগে ধর্মীয় বারো সাংস্কৃতিক যোগা-যোগ য়াম অয়া আসিল—উহানে বার্মা বারো দক্ষিণ-পূর্ব এশিয়ার ধর্ম-সংস্কৃতির প্রভাব পড়িল ! উহানে শৈব ভাবনা মিশ্রিত বিষ্ণু উপাসনার প্রচলন মণিপুরে আসিল ! এসাদে শৈবধর্মর আধারে বিষ্ণু নিঙকরলা মণিপুরর থাইনাকার প্রাকৃত ভাষী( Indu-Aryan speaker) দাপা গৌড়ীয় বৈষ্ণব ধর্মে ইলইলেও আগেকার শৈবভাবনাত্ত না’থেয়সি ! উহানে মণিপুরীয়ে(মেইতেই/বিষ্ণুপ্রিয়া)পালন করতারা ধর্ম-সংস্কৃতিত আদিম শৈব ধর্মর নিদর্শন আসে ! শৈব উপাসনার লিম উতা সাম করিয়া উপস্থাপন করানির হত্না করুরী :=
1) গৌড়ীয় বৈষ্ণব ধর্মানুসারী মণিপুরীর(মেইতেই/বিষ্ণুপ্রিয়া)রাধা-কৃষ্ণর লেইফামে মাতৃ-চিহ্ন সম্বলিত শিবলিঙ্গগ থনা বাধ্যতা মূলক ! দর্শনার্থী ভক্ত-জন আগে মাহাদেব গিরকরে হমাদিয়া পিসেদে রাধা-কৃষ্ণ সহ লেইফামর দৌ হমা দিতারা !(অন্যান্য গৌড়ীয় বৈষ্ণব রাধা-কৃষ্ণর লেইফামে মাহাদেব না’থইতারা !
2) মণিপুরীরতা যে কুন পরিবার বা গরে ডাঙর কর্ম-কাসা করলে যেমন--- গর অঙনি, সেন্দানাম-কীর্তন, লুহঙ এসাদে কর্ম করলে, কর্ম-পরবর্তী খেলতামে থপুর গরে মাহাদেব পূজা আহান করানির প্রচলন আসে !
3) প্রায় হাবি মণিপুরী লয়াত/গাঙে মাহাদেবর লেইফাম(শিব-থলি) আসে !উগ লামর দৌগ বুলিয়া নিঙকরতরা ! বিভিন্ন লয়ার এবাকার বাসিন্দা উতার পূর্ব-পুরুষে লাম খুলেসি উবাকাই খানি সিনা-ফাম আহান চেয়া মাহাদেব গিরকর লেইফাম(থলি)হান স্থাপন করেসি, উহান উপ পারিয়ার ! এহানও মণিপুরীর শৈব উপাসনার আদিম পুষারাকপা রীতি হান !
4) বসর হান পাক দিলে নুয়া বসর পইলাদে আকদিন গাঙর ইমা-ইন্দোল বেয়াপা হাবি পুলয়া কাদা বারার মাহাদেব থলিত্ এই,ফল,সেলকম কাত্ করতারা-- পূজা করতারগা ! অঞ্চল ভেদে কুনপেইত শনিবার,কুনপেইত রবিবার বা কুনপেইত সোমবারএ মাহাদেব গিরকরে লামর দৌগ নিঙ করিয়া করতারা অনুষ্ঠান হান !
5) অনেক বুজন গিরি-গিথানিয়ে ‘অপোকপা গিরক’ মূলত মাহাদেব বুলিয়া মাততেও হুনেসু!
এসাদে তথ্যে নিঙে অর মণিপুরী ধর্ম-সংস্কৃতির পাপে-পাপে শৈবভাবনা নাপয়া আসে ! বিশেষ করে মাহাদেব গিরকরে লামর দৌগ বুলিয়া বিষ্ণুপ্রিয়া মণিপুরীয়ে নিঙ করতারা এহান এদাপার লোক বিশ্বাস হান ! এহানে নিঙে অর বিষ্ণুপ্রিয়া মণিপুরী আগেদে শৈব আসিলা, বা তানুরে কাল’করিয়া আসিলা রাজবংশ উহান 'শৈব' আসিলা ! শৈবধর্মর আধারে বিষ্ণু উপাসনা করেসি আরো রামান্দি ভক্তিবাদ গ্রহণ না’করেসিলাতা পাউরি, বারো গৌড়ীয় বৈষ্ণবধর্মও পইলাদে ল’নি না’করেসিলাতা সম্ভবত উহানর'কা ! পরবর্তী সমেয়ত শিব উপাসনার শর্ত সাপেক্ষে গৌড়ধর্ম গ্রহণ করেসি পাউরি, উহানে মণিপুরীর রাধা-কৃষ্ণর লেইফামে শিবলিঙ্গগ থইতারাতা ! মণিপুর উপত্যকার আরাক নাঙ আহান ‘শিবনগর’(মহেন্দ্র সিংহ)—হাকতাক আহানাত লাম এহানাত শৈবধর্ম সিতারানির কারণে এসাদে নাঙে পালসেতা !
তথ্যর লিম:
* “The History of Manipur(An Early Period)”- By W। Ibuhol Singh.
* “(Miss)Interpretations of Burmese Words, In the case of the Term ‘Kala’(Kula)”— By U Khin Maung Saw.
* “Archaeology In Manipur” –By L. Kunjeswori Debi.
* “Hindu Iconography In Bagan”—By Myint Myint San॰
* “খুমল পুরাণ” –By মণিপুরী পন্ডিত নবখেন্দ্র সিংহ (অনুবাদক –নবদ্বীপ সিংহ) (**বার্মাত পাসি থাইনাকার মাহাদেবর মূর্তি --* “Hindu Iconography In Bagan”—By Myint Myint Sanর পাংলাকে)
লেখক
প্রতাপ সিংহ
কৈলাসহর, ইন্ডিয়া
0 Comment "মণিপুরী ধর্ম-সংস্কৃতিত শৈবভাবনার প্রভাব-প্রতাপ সিংহ"
একটি মন্তব্য পোস্ট করুন