পূর্ণিমার মিঙালহানলো প্রতি বছর রাসপূর্ণিমাহান আহের বারো আমি হজাক অরাং আমার সংস্কৃতি লেরিক, রুহিবৃত্তি অতালো । আমারতা আছে ঙালকরা সংস্কৃতি বারো বিধি বিধান । এরে সংস্কৃতি এহানরে না ঙালকরলে আহিতারা জিয়া জিবুত পাহুরে বেলতায় আমার ইতিহাস বারো আমার হাবি কৃষ্টি কালচার । চমৎকার এরে সংস্কৃতি এহানরে হাবির মুঙে আনে নুয়ারলে বারো বর্তমান যুগর লগে নিজে খানি পরিবর্তন নাইলে কিসারে ইতইতা ? হুদ্দা আমার নৃত্য শিল্প এহানরে হবা পেইয়া কবিগুরু শান্তি নিকেতনে গিয়া নুয়া কলা আগো খুলেসিল । তাইলে হারপিক আমার কৃষ্টি কালচার এতা কতিহান মানুর মনরুচক । 'নিংশিং চে’ ম্যাগাজিন এহানরে মুঙে দিয়া আমি সমাজর হুরকা ইলেও খানি কাম করানি মনেয়ার বারো প্রতি বছর মণিপুরি বিষ্ণুপ্রিয়া সমাজর সাহিত্য ভান্ডারগো দাঙর করানির চেষ্টা কররাং । হাবির আশির্বাদ বারো পাংলাক পেইলে আমি আরাকউ মুঙে যানা পারতাঙাই বুলিয়া নিংকরুরি । আমি প্রতি বছর নুয়া গাওরাপা বারো পুরিজেলারে মণিপুরি বিষ্ণুপ্রিয়া সাহিত্য জগতে কাম করানির অনুপ্রেরণা আহান হংকরিয়ার ।
যেহারকা আমি নুয়া লেখকরে প্রাধান্য দিয়া লেখা ছাপেয়ার বারো আমার এরে হুরকা চে এহারমা আমার সাহিত্য শিল্প এহানরে সমৃদ্ধ করানির চেষ্টা কররাং । এমারি কয়েকগো খুদে লেখকরে উৎসাহ দিয়া লেখা লেখুইলাং । বারো আমি হাবিত্ত হবা লেখা অহানরে পুরস্কৃত করানির চেষ্টা করিয়ার । আশা থরাং আহিবো দিনতাত আমি নুয়া নুয়া পাঠক বারো লেখক নিকালতাঙাই । মান সম্পন্ন লেখা লেংকরানির প্রশিক্ষণ দিতাঙাই । হাবিরে মহারাস লীলার থাকাৎ ।
কাজল সিংহ
উপদেষ্টা, নিংশিং চে - ২০১৯
এতু করানির অপশনহানিঃ
|
|
0 Comment "ভূমিকা - কাজল সিংহ (২০১৯ সংখ্যা)"
একটি মন্তব্য পোস্ট করুন