সম্পাদকীয়
“নিজর কাজে জনম এহান, সমাজর কাজে মিকুপ আহান”
এরে কথা এহান বার বার মুরগোৎ খেলার । সমাজরাঙ মি ব্যক্তিগত ভাবে দ্বায়বদ্ধ । আহিসু কয়েকদিন থাইতউ বারো আকদিন ফংকো দৌ ইতউ । কিত্তাও মি পানারতা নেই বারো মর সুবাদে মর সমাজ হানৌ কিত্তাও নাপেইবা । মি ১ বুলিয়া আরাম্ভ করলে আরাক আগই ২ বুলিয়া নুয়া সংখ্যা আহান হংকরানিৎ উদ্ভুদ্ধ ইতইতা । তাইলে, মরতাও সমাজরাঙ দায়বদ্ধতা আহান আসে । সমাজকা কিছু আহান করে পারলেই মি নিংকরুরি মর দায়বদ্ধতা এহান আংসিল গাঠি আগো দেনা পারলু বুলেয়া । সমাজে মরে কিত্তাও নাত্তারা । দিন আহান খানারকা বাত চারুক আহানউ নাদতারা, মি হিমপাউরি বুলিয়া সাহায্য আহানউ নাকরতারা । তাইলে কিয়া মি সমাজরাঙ দায়বদ্ধ ?
সোজা কথাৎ মাত্তে গেলেগা মি মাত্তউ , সমাজ কোন ব্যক্তি আগোর নাঙহান নাগই । এহান পুরা জাতি আহানর রিপ্রেজেন্টেশনহান । এহাত্ত পানারতা কিত্তাউ নেই । এহান এক প্রকার উলঙ্গ মানু আগো । তা খানা নুয়ারের, পিনা নুয়ারের । আস্তা সমাজ হানর ভিতরে আকজ্ঞই হবানেই কাম আহান করানি অহান উলঙ্গ মানু অগরে আঘাত করানির স্বরূপ । বারো সামাজিক কাম-দাম করানি এহান ইলতাই এরে উলঙ্গ মানু অগরে ফুতি ফানি পিদাদেনার স্বরূপ । যত বেশি সামাজিক কাম করতেই ততোবেশি মানু অগরে সাউস করেদেনা হান বুঝার । আর সমাজ আহার লগে আরাক সমাজ আহান তুলনাহান ইলতাই কতিহান সাজেসে উলঙ্গ অয়া আসিল মানু অগো অহানই বুঝার । মি হুরকা সৌগো হান নাপাওরি । তবুও সমাজ এহানরে খানি হুনা-রূপালো সাজানি মনেয়া এসারে উদ্যোগ আহান নিয়াসু । মি কম্পিউটারলো ব্যাচেলর অব সাইন্স ডিগ্রিত তামকরুরি । মর হাতে যেতা আসে অতালো মুরগো খাটিয়া উলঙ্গ মানু এগোরে সাজানি মনেয়া এসারে হুরকাং চে এহান করানিত ধরিসু । পইলাকা হুরকা করিয়া ফং করলাং । দিন দিন নিংশিং ম্যাগাজিন এহান দাঙর অর । হাবির পাংলাক পারাং । হারৌ লাগের যেপাগা প্রিন্ট কমপ্লিট ইয়া নিকুলের অহাত । যেপাগা রাসপূর্ণিমাৎ স্টল আগো বহিয়া নিংশিং চে স্টল বুলিয়া হুরকা পরিচয় আহান দেরাং অহাত ।
এমারি আরাকউ হবা করিয়া অনেক আগেত্ত উদ্যোগ নিয়াসিলাংগা বার মান সম্মত পত্রিকা আহান ফংকরে পারলাং বুলিয়তে মনে করুরি । নুয়া কতহান ফিচার এমতাগা যোগ করানি ইসে বারো নুয়া কতগো লেখক বিসারেয়া আমি এমারিকার চে এহান তারুণ্যমুখি করানির পদক্ষেপ আহান নিয়াসিলাংগা । বারো অসারেই বাস্তবায়ক করে পারলাং বুলিয়া মি মনে করুরি । পইলাকার কথাহান ইলতাই আমার চে এহান ফ্রীহান । অর্থ্যাত, অলাভজনক প্রতিস্থান আহান । যেকোনগই ওয়েবগোত্ত হমিয়া সহজেই পাকরে পারতাই অথবা আমি এন্ড্রোয়েড এপ আহান হংকরেসি অহানাৎ গিয়াও চানা অকরের । আমার এপ এহান গুগল প্লেস্টোরে আসে “NingshinChe” লিখিয়া সার্চ দিলেই পানা অকরতই । চেহার ভিতরে প্রতিটা লেখায় গসহার বাতেদে কিউ.আর কোড (QR code) দেনা অসে। মোবাইল হান্নো স্ক্যান করলে সরাসরি ইন্টারনেট ভার্সনহান আপনাআসি চা পারতাউ । বারো পূর্ণিমারাসর দিনে পিডিএফ (PDF) আকারেউ ফংকরলাং । PDF ফাইলগো চানা হাদাপেইলে ফাইল www.tiny.cc/ningshingche2019 এরে লিংক এহান খিয়ালে থইক। এহান আমার হাবিত্ত দাঙর কামহানি। আমি মানুরাং সহজেই আমার লেখা বারো কামহানি দেখাদে পাররাং।
সাহিত্য সমৃদ্ধির লগে আর্থ-সামাজিক উন্নয়ন আহানউ নিংকরিয়ার । হাবির পাংলাক পেইলে আমি এসারে আরাকউ অনেক সামাজিক কাম সিজিল করে পারতাঙায় বুলিয়া নিংকরিয়ার । থাকাৎ হাবিরে।
সুরজিত সিংহ শিশির
সম্পাদক, নিংশিং চে ২০১৯
ফটো ভার্সনঃ
0 Comment "নিজর কাজে জনম এহান, সমাজর কাজে মিকুপ আহান - সম্পাদকীয়"
একটি মন্তব্য পোস্ট করুন