শ্রী শ্রী রাখালতলী কাঙালদাসজীউ
আশ্রম
ভানুগাছ পরগণার মাজে নাংপালপা গাঙহান তিলপুর (নগর) । সময় অহাত মহারাজ ভাগ্যচন্দ্রর কিতা পারা বংশধর আগ এহাত বসতি করেসিল , মহারাজার রাণীর নাঙ পালুইসে এপাগাও । এরে গাঙে জরম ইসিলা গিরক সড়ক বাবা, পন্ডিত শ্রী নবকুমার বিদ্যাভূষন, জনার্ধন পন্ডিত, বীরসিং পন্ডিত, সমাজ সেবারী অজা দীননাথ সিংহ’র সাদে কীর্তিমান গিরিগিথানি । গাঙএহাত (১৯২০-১৯৬৫) পর্যন্ত বিখ্যাত “কুম্ভমেলা” বুলিয়া উৎসব আহান ইসিল ।নগরর মুঙর বারাদে চারিবারা রোকর সপানো বারো ফুলর বাগানে বেরিয়া পাখিয়া পনিয়ার রোউহানে ইঞ্চিত চিকুয়া বৈদিক মুনি ঋষির আশ্রমর সাদে আহান আসে । নাঙহান “শ্রী শ্রী রাখালতলী কাঙালদাসজীউ আশ্রম” । মণিপুরি সিদ্ধ সাধক মহাপুরুষ আথৈ বাবার প্রশিষ্য শ্রী শ্রী কাঙালদাসজীর ইথৌয়ে তার শিষ্য সাধক রাজমোহন গিরকে এরে আশ্রম এহান লিংখাৎ করেসেহান ।
আথৈ বাবার জরম অসেতা আজিত্ত ১৫০ বছর আগে অক্ষয়তৃতীয়া তিথিৎ । এসারে আমার মণিপুরি সমাজর তিনগো বিখ্যাত সাধক ইলাতাই,
১। শ্রীলভুবনেশ্বর সাধু ঠাকুর
২। শ্রী আথৈ বাবা বারো
৩। সাধু কৃষ্ণ কান্ত
তাঙি তিনগি আকহাত তিলসিলা। পরে নিজর নিজর ভজন ক্ষেত্রদে ভাগ ইসিলা। গিরক আথৈ বাবা শৈল্যতীর্থ ঊনকোটিদে সালসিল ভজন বারো সিদ্ধি লাভর সার্থে । আথৈ বাবা ঊনকোটিত যেবাকা আহিল সময় অহাত শৈল্যতীর্থ উনকোটি মনুষ্যবর্জিত ইঞ্চিক চিকপা তেঙারাগ ইয়া আসিল। গিরকে শৈলক্ষেত্র এহার মধ্যে শ্রী বিষ্ণুপাদ পদ্মর মুঙে বহিয়া প্রভুর ধ্যানে লীন ইল । রোদ-বরন, জার-সৌকরা হাবিতা আহের যারগা তাঙর ঋতুভেদ অনুসারে কিন্তু আথৈ বাবা প্রভুর চরণধ্যানে বহিসে ইমে বহিসে । ধ্যান করতে করতে দেহ’র হাবি বন্ধন ককিল, গারিগত কোন ফুতিফানি নেইল । কোন পাহাড়ি সাধক গিরক আগোই তারে সঞ্জীবনী বিদ্যা বাঙাদিয়াসিল । এরে বিদ্যার কারণে সাধকরতা দেহর ক্ষুদাতৃষ্ণা নেই। এসারে অনাহারে ভজনে থাইতে থাইতে গিরকর আকদিন ধ্যান ভঙ্গ ইল । তা কাদাহার কুন্ডগৎ স্থান করিয়া প্রভুরাঙ হাকরত বুলিয়া নৈবেদ্য খানি বিসারার । বনহাৎ কুকিয়ে জুম চাষ করলা । অহাত্ত কিতা খানি আনিয়া প্রভুরাঙ হাকরিয়া নিজে প্রসাদ পেয়া বারো ধ্যানে বহিল । তা জুমর ফল সিরিয়া আনের অহান কুকি আগোই দেখে বেলাসে । কুকি অতা কথা হান হুনিয়া তিক সৌইসিলা । এহার শাস্তি দিতা বুলিয়া হাবি আকতা ইয়া তারে বিসারিয়া আহিলা । কুকিয়ে তারে আহিয়া দেখিয়া ঙাকবরলাগা । দেখতারা, গিরক অগই বিষ্ণুপদর মুঙে ধ্যানে বহিসে । তার পিসহাৎ দলা বাঘ আগো ঙাহিয়া আসে । বাঘগর লগে গিরকরে দেখিয়া জবর দরপাবেল্লা । তাঙি গিরকরে প্রসিদ্ধ সাধক আগো বুলিয়া চিনতে দ্বিধাবোধ নাইলা । অহাত্ত করিয়া তাঙি আথৈ বাবার কাদাহাৎ আহিয়া ফলমূল কাতকরেদেসিলা । ইন্ডিয়ার পুরীৎ আসি আমার মানু অতাই তার এরে গুণর কথা হুনিয়া চানাত আহেসিলা । গিরকরে অনেকগই চিনলা । মাতলা “গিরক, কর্মতর্ম ইলেতে গিরকরে পানা হিমপিতাঙায়, গিরক যদি এরে লাম দূরি এহাত্ত খানি গাঙ গরর কাদাহানাৎ আহিলে আমি কৃপা পেইলাঙ অইস । ” আথৈ বাবায় মাতলো, মরে তুমি নিংশিং ইয়া তুলসি মুঙগত বার্তন আহান দিলে মি তুমার কর্মত আপ্পানে সময় মত আহিয়া পরতউগা । চিন্তা নাকরিয় । মানুয়ে কোন কর্ম জর্ম ইলে গিরকর কথামত তুলসি মুঙগৎ তার বার্তন নিঙে হমাদিলে দলা বাঘ আগোৎ চরিয়া গিরক আহিসিল। আথৈ বাবার প্রশিষ্য থাম্বৌ সাধু, বদন সাধু, কাঙাল দাসজী, রাধা সাধু, রাজাসাধু এসারে সমাজে দাঙর ভাবধারা প্রচার করিসিলা ।
আথৈ বাবার ভজন ধারা চেইতে খানি শৈব্যধারাহান মালুইলেও মূলত বৈষ্ণব ধারাহান । তবে ভজনে হমিতে গেলেগা পইলাকা বৈষ্ণবাগ্রগণ্য মহাদেবর কৃপা লাগের অহানে আশ্রমে শিবলিঙ্গ থইতারাহান। আমার সংকীর্তনে হমিতে গেলেগা পইলাকা খম্বাম্ফমে উনা অনা লাগের। এরে খম্বাম্ফাম এহাত বহের গিরক মূলত গোপেশ্বর মহাদেব স্বরূপ । অহানে শ্রীবদ্ভগবতে মাতেরতা,
“বৈষ্ণবানাং যথা শম্ভু” ।।
আথৈবাবার ভজন মার্গর আমার দেশে বিখ্যাত সাধক শ্রী কাঙাল দাসজী । বিশেষ করে নগরর পালিগত , ভানুবিলে প্রচার করিসিল । তার শিষ্য শ্রী রাজমোহন সাধুয়ে লিংখাত করিসিল- “ শ্রী শ্রী রাখালতলী কাঙালজীউ আশ্রম ” ।
ছবিএগোৎ গিরকর আশ্রম প্রতিষ্ঠা বারো যৎ কিঞ্চিৎ আশ্রমর সাধু গিরক রাজমোহন সিংহর জীবনী উল্লেখ আসে । গিরক আমার সমাজর সাধু পুরুষ আগো । গিরকর আশ্রম বারো তার স্মৃতি সংরক্ষণার্থে আমার উচিৎ আমি সাহায্য সহযোগিতা করানি ।
শ্রী হেমন্ত কুমার সিংহ
মাধবপুর, কমলগঞ্জ, বাংলাদেশ।
0 Comment "শ্রী শ্রী রাখালতলী কাঙালদাসজীউ আশ্রম-শ্রী হেমন্ত কুমার সিংহ"
একটি মন্তব্য পোস্ট করুন