দামোদর মাহার কেরকেরা
সুরজিত সিংহ শিশির
বছরহার কার্তিক মাহাহান আহিলে ঘরে ঘরে সেন্ধাহাৎ প্রদীপ জালারাঙ । কেরকেরাগো বাহানো গসহানদে তুলরাঙ। নিয়মর পালিৎ গিয়া লেরিক হুনরাঙ। বিয়ানে মঙ্গলারতী কররাঙ। আসলে কি কারণে এরে কেরকেরা গজেদে তোলানি লাগের আজি খানি বাগিয়া হারপিক।
পদ্মপুরাণ, ভাগবতপুরাণ, স্কন্ধপুরাণ বারো শ্রীহরিভক্তিবিলাস শাস্ত্রে এরে মাহা এহার মাহাত্ম্য বিশেষ করিয়া লেখানি ইসে। নানান জাগাৎ এহানরে ভক্তি ওয়ারির তুনো মাতানি ইসে। কথিত আছে যে, কলিপ্রীয়া বুলিয়া বেয়াপা(নারী) আগো তেইর হেয়োকরে বধ করে বেলাসিলি। পরে নিজর ভুলহান হারপিয়া প্রায়শ্চিত্তরকা এরে কার্তিক মাহা এহাৎ একনিষ্ঠ ইয়া ভগবান শ্রী কৃষ্ণর নাঙে দীপ দিয়া হারাদিন পূজা অর্চনা করেসিলি। যেহারকা তেই মরানির পরে হেয়করে বধ করিয়াও বৈকুন্ঠ ধাম পাসিলি। এসারে আরাকউ কাহিনী আসে।
শ্রী কৃষ্ণ এরে মাহা এহাৎ তার মানকর লগে পরমৌকৃষ্ট দামোদর লীলার প্রকাশ করেসিল বুলিয়া এরে মাহা এহানরে দামোদর মাহাহান বুলতারা। হুরকাকালে ভগবান শ্রী কৃষ্ণ রাখালোর লগে খেলা করিয়া সেন্ধাহাত ঘরে আহিলে মানক বারো হাবি সখিয়ে শ্রী কৃষ্ণরে আরতী আহান্ন বরণ করেছিলা। বিয়ানে রাখালর লগে নুকুলানির সময়ৎ আরতি আহান্ন কৃষ্ণরে সালকরেদেসিলা। যেহারকা এরে মাহা এহাৎ বিয়ানে আমি মঙ্গলারতি কররাং বারো সেন্ধাহাৎ সন্ধ্যারতি আহান কররাং। শ্রী কৃষ্ণ দামোদর রূপে মানক যশোদার লগে মাতৃপ্রেম রচনা করেসিল। এরে মাহা এহানাৎ ভগবানরে দীপ ফুল ফলে আহবান করলে ভগবান চালাক ইয়া সন্তুষ্ট অর।
শাস্ত্র মতে:
শুক্রগুরু বলিরাজারে মাতেসিলতা, শল্লকীয় নির্যাস ব্যতীত আরতা যেতা নুংশিপা সপা আছে অতার ধুমা দৌয়ে নুঙশি পেইতারা। সপা অতার লোক জিগৎ পুরলে নুংশিপা গৎ আহের। অরে নুংশি গৎ এগরে “সারীধূপ” বুলতারা। এরে সারীধূপর ধুমা এগোর গতগো জবর নুঙশি। ফুল দিয়া ভগবান যেসাদে সন্তুস্ত অর অসাদে ধূপেউ সন্তুষ্ট অর।
আমি যে গসহানদে দীপ জালারাঙ অহার মাহাত্ম্যহান ইলতাই, দীপ(জিগো) উর্ধ্বগামী তেজপদার্থ আহান । অতএব, দীপ গসহানদে প্রজ্বলিত করলে মানুর তেজঃ বৃদ্ধি বারো উর্ধ্বগতি লাভ অর । বারো অন্ধ তামিশ্র নরকেতো বাচানিরকা উত্তরায়ণর রাতি আমারতা গসহানদে দীপ প্রজ্জ্বলন করানি থক। দীপ প্রজ্জ্বলন করলে আধারোর পকগো মাঙর। স্বরূপ যেহান মানুরে অন্ধতামিশ্র নরকে জানাত্ত উদ্ধার করের। বারো যদি দীপ নাদরাঙ তাইলে কথিত আছে যে, মানুঅগো প্রভাহীন বারো অন্ধ ইয়া নরক ভূগ করানি লাগের।
দামোদর মাহা এহান পালনর নিয়ম কানুনঃ
এরে মাহা এহাৎ প্রত্যেক মন্দিরে বারো ঘরর তুলসীমুঙে ভগবানর নিঙে দীপ প্রজ্বলন করানি থক। পদ্মপুরাণে মাতানি ইসে, এরে পূণ্য মাহা এহাৎ যেগই প্রদীপ প্রজ্বলন করতাই অগোরতা আরতা পুনঃজন্ম নার বারো পাপ নাশ অর। মাটির ঘটি আগোৎ সলিতা বারো ঘি সমেত খনিজ তেল বারো কর্পূর দিয়া দ্বীপ প্রজ্বলন করানি হবা। কৃত্রিম ঘি ব্যবহার নাকরানি। যে প্রদীপগো জালিতাঙাই অগো উজ্জ্বল ইতই মাহি আমার গারিগোত্ত পাপ মুক্ত ইতই। স্কন্ধ পুরাণে মাতিসে, এরে মাহা এহাৎ যেগোই প্রদীপ নাদতারা তানু ব্রহ্মঘাতী, গোঘাতী, স্বর্ণ অপহারী বারো সদামিথ্যাবাদী নাঙে পালইতাই।
0 Comment "দামোদর মাহার কেরকেরা - সুরজিত সিংহ (নিংশিং চে - ২০১৬)"
একটি মন্তব্য পোস্ট করুন