আমার ঠারোর পত্র-পত্রিকা,
লেইমাং অনার পথেদে আমার সাহিত্যচর্চা
বিষ্ণুপ্রিয়া মণিপুরি সমাজে ফংইসিল পইলাকার পত্রিকাহার নাঙহান ইলতা “জাগরণ”। ১৯২৪ সালে সিলেটেতো প্রকাশ ইসিল পত্রিকা আহান। এম.সি কলেজে তামকলা আমার মানু হরিদাস সিংহ, অর্জুন সিংহ, বাবুচাদ সিংহ, নবদ্বীপ সিংহ’আসিয়ে নিকাললা পত্রিকা এহান । বাংলা ঠারোর পত্রিকাহান ইলেও বিষয়বস্তু মণিপুরি সমাজ সংস্কৃতির লগে সম্পর্কিত। হাদি হাদিৎ আমার ঠারোর লেখাও ছাপানি ইসিল। এহানর পিসে নিকুলিল “মণিপুরি” পত্রিকাহান ১৯৩৩ সালে। ১৯৩৭ সালে নিকুলিল “মেখলি” পত্রিকা এতাৎ মহেন্দ্র কমার সিংহ, কৃষ্ণকুমার সিংহ, দীননাথ সিংহ গিরকগাসির মণিপুরি জাতির ইতিহাস বিষয়ক লেখা প্রকাশিত ইসিল। ১৯৬০ সালে আসাম’র দূর্লভ সরাত্ত “ফাগু” বুলিয়া সাহিত্য পত্রিকা আহান প্রকাশিৎ ইসিল। পত্রিকা এহান নংসাং দিন চলেসিল। পত্রিকা এহান অমরেন্দ্র সিংহ, সেনারূপ সিংহ, ব্রজেন্দ্র কুমার সিংহ, লক্ষ্মীকান্ত সিংহ, কুঞ্জবাবু সিং, ইন্দ্র কুমার সিংহ’গাসির গবেষণামূলক প্রবন্দ, গল্প, কবিতা, ছড়া, নাটক ইত্যাদি লেখানো সমৃদ্ধ ইসিল। ১৯৬৮ সালে আসামর হাইলাকান্দিত্ত কবি ব্রজেন্দ্র কুমার সিংহ’র সম্পাদনায় “প্রতিশ্রুতি” বুলিয়া পত্রিকা আহান প্রকাশ ইসিল। সাহিত্যর মানদন্দ বিচারে পত্রিকা এহান গজর থাকর হান আসিল। পত্রিকা এহাৎ আমাত লোকসংস্কৃতির আদি নিদর্শন “বরন ডাহানির এলা”, “পৌরেই” ইত্যাদি সংখ্যাহান লেহে প্রকাশ ইসিল।
১৯৭০ সালে ত্রিপুরার আগরতলাৎ “আমার পৌ” প্রকাশিত ইসিল। ত্রিপুরার রাজনীতিবিদ তথা লেখক বিমল সিংহ নিয়মিত লেখলো পত্রিকা এহাৎ । ত্রিপুরা সরকার লেইসি লেইথলে “ত্রিপুরার চে” বুলিয়া পত্রিকা আহান প্রকাশ অর। পত্রিকা এহাৎ বিমল সিংহ গিরকর উপন্যাস হান “লামপইপার তেইঙ” ধারাবাহিক ভাবে প্রকাশ ইসিল।
আগেদে উল্লেখ করলু পত্রিকা অতাবাদেও আরাকউ আবকচা পত্রিকা প্রকাশিত ইসে। যেতা কতহান সংখ্যা নিলুলানির পিসে বন্ধ ইসিল। কতহান এপাগাও হাদিহাদিৎ নিকুলের। এসারে পত্রিকার নাঙ কতহান নিকুলের উল্লেখ্য করুরি-
১। নুয়া এলা
২। সরারেল
৩। অপরুপা
৪। চেতনা
৫। কবিপক্ষ
৬। পঞ্চশ্রী
৭। লোকতাক
৮। আর্জুনি মণিপুরি
৯। হৃদির পৌ
১০। বিশল্য করণী
১১। কাল’র বৌ
১২। কন্নাপি
১৩। বেলী ইত্যাদি ।
এপাগা বাংলাদেশে বুলাহান দিক। ভারতে গেলগা শতাব্দির তিরিশর দশকেত্ত আমার ঠারে সাহিত্য চর্চা আরাম্ভ ইলেও আমার দেশে স্বাধীনতার পিসেতো সাহিত্য চর্চার লেইসিং বারাসিলা ১৯৭৪ সালে সসিলেটে তামকরলা কলেজ ছাত্রতাই তিলয়া “খংচেল” নাঙে পত্রিকা আহান প্রকাশ করেছিলা। পত্রিকা এহানরে কেন্দ্র করিয়া দাপা আহান লেহক নিকুলেসিলা। যেতাই এপাগাও আমার সাহিত্য মালেমহান ইঙাল ঙালকতারা। এহাৎ আমি ডঃ রঞ্জিত সিংহ, গল্পকার সুরেন্দ্র কুমার সিংহ বারো কৃষ্ণকুমার সিংহ’র নাঙ লনা পাররাং। ১৯৭৯ সালে রামকান্ত সিংহ’র সম্পাদনাৎ ইমার ঠার পত্রিকা প্রকাশ ইসিল। এ পত্রিকা এহানরে কুইকরিয়াও লেখক দাপা আহান নিকুলেসিলা। ১৯৮৯ সালে উত্তম কুমার সিংহর সম্পাদনাৎ “পৌরি” বুলিয়া পত্রিকা আহান প্রকাশ ইসিল। মণিপুরি সমাজর নানান পৌ বারো পৌ আতার বিশ্লেষণ করানি ইসিল পত্রিকা এহাৎ। পত্রিকা এহানর মাধ্যমে সাহিত্যিক বারো সংস্কৃতিক বিপ্লব আহান সূচিত ইসিল। নংসাংদিন জিরানির পিছে ২০০৪ সালেত্ত সুশীল কুমার সিংহর সম্পাদনাৎ “পৌরি পত্রিকা” নাঙহানল বারো প্রকাশ অনা অকরলো। পত্রিকা এহানার মাধ্যমে কবি শুভাশীষ সিনহা, প্রাবন্দধিক হেমন্তকুমার সিংহ, গবেষক অসীম কুমার সিংহ, কলামিস্ট রসরাজ শর্মা প্রমুখ লেখক আত্মপ্রকাশ করলা।
১৯৯৪ সালে সংগ্রাম সিংহর সম্পাদনাৎ “ইথাক” নাঙর পৌর চে আহান প্রকাশ ইসিল। আমার সমাজর নানান পৌ, হবা হবানেই নানান খবারা খবরলো এরে চে এহাৎ সাজানি ইসে। এতা বাদেও সুমন সিংহর সম্পাদনাৎ “গাউরাপা”, অঞ্জন সিংহর সম্পাদনাৎ “কুমেই”, শ্যাম সুন্দর সিনহার সম্পাদনাৎ “তেইপাং”, শুভাশিষ সিনহার সম্পাদনাৎ “মণিপুরি থেয়েটারর পত্রিকা” সহ আরাকউ কতহান পত্রিকা প্রকাশিত ইসিল।
এপাগা কথাহান ইলতা আমার অধিকাংশ পত্রিকা আতারতা “প্রজাপতি আয়ু” । প্রজাপতি বপদিন জিংতা নাথাইতারা। আমার পত্রিকা অতাউ দুহান তিনহান সংখ্যা নুকুলানির পিসে দোউর খা পার। বন্ধ অনার নানান কারণ -
ছাপানির রুপা খমকরে নুয়ারানি, আমার সমাজর মানুরতা পত্র-পত্রিকা পাকরানির অসাদে আগ্রহ নাথানি, লেখক নেয়োনা ইত্যাদি ইত্যাদি। কিন্তু পত্রিকা আহান নিয়মহান প্রকাশ ইলে লেখক সৃষ্টি ইতারা অহান হাইহান। সম্পাদকর চাপে পড়িয়া ইলেঊ লেখকে লেখতে বাধ্য ইতারা। সম্পাদকগই না থৌকরলে লেখকউ লেখানিৎ আটেল পেইতারা। বাংলাদেশেত নিয়মহান করে পত্রিকা আহান প্রকাশ করে নুয়াররাং এহান দুঃখজনকহান। আমার সমাজর তথাকথিত সমাজ সেবারির সাহিত্য বিমুখতা অহানে সম্ভব নার নিয়মিত পত্রিকা নিকালানি। লেখক নেইলে পাঠক নেইলে কিসারে পত্রিকা ছাপতইতা।? বাংলা পত্রিকা আতা পাঠক নাপেইলেউ বেচে নুয়ারলেউ নিয়মিত নিকালতারা। আমার পত্রিকাৎ কুঙ্গই বিজ্ঞাপন দিতা? কোন স্বার্থল দিতা?
নুয়া প্রজন্মরাং আমার আবকচা আশা ভরসা। কিন্তু তাঙি আমার আশা খৌরাং পূরণ করানি নুয়ারতারা। এপাগার সৌ লেরিক-পত্রিকা পাকরানির বারা অহানদে হেইচিংহান নেই। ইন্টারনেটে , ফেইসবুকে এপাগা সাহিত্য চর্চা অর। ইন্টারনেটে সাহিত্য চর্চা করতে গেলেগাউ লেরিখ তামকরানি লাগের। হবা পাঠক আগো ইলে অগই লেখতই লেখা অতার মান আহান থার। অহানে নুয়া প্রজন্মর প্রতি মর আহ্বান হান- নিজে লেরিক পাকরিয়া নিজে সমৃদ্ধ ইক, লেখালেখি করিয়া নিজর সাহিত্যহানরে সমৃদ্ধ করিক।
সুশীল কুমার সিংহ
ঘোড়ামারা, কমলগঞ্জ, বাংলাদেশ।
লেখা এহানাত আমার ঠারর পত্র পত্রিকার করুণ চিত্র উগ শাতয়া আহেসে। তেবৌ আমি পত্রিকার হবা দিন বাসেয়া আসি। শৈনেই হবা দিন আইতই।
উত্তরমুছুনThakat girokore.
উত্তরমুছুন