মাধবপুরর রসোরসে
রনি সিংহ
রনি সিংহ
শাস্ত্র মতে, মাঘ মাসের শুক্ল পক্ষর পুর্ণিমা তিথিৎ শুক্রবারে কলিযুগর উৎপত্তি। এহার আয়ুস্কাল ৪,৩২,০০০ মারি । এরে যুগ এহাৎ পুণ্য থাইতইতা এক ভাগ বারো পাপ থাইতইতা তিন ভাগ । শ্রী কৃষ্ণ পাপোর কলি হমিল বুলিয়া পৃথিবীহান ত্যাগ করিয়া গেছিল সময় অহাত্ত কলির প্রারম্ভ বুলিয়া লেরিক লেইসুৎ উল্লেখ আছে । আমি বিষ্ণুপ্রিয়া মণিপুরি । আমি অর্জুনর বংশধর । অর্জুন দ্বাদশবর্ষব্যাপী ব্রহ্মচর্য ব্রত পালন করানির সময় মণিপুররাজ্যে আহেসিল । অহাত চিত্রাঙ্গদার লগে পরিচয় ইয়া তেইরে লোহং করের । তানুর সৌগো আজ্ঞ, নাঙহান “বভ্রুবাহন” । বভ্রুবাহণর নাড়িগো ধরিয়াই আমার বাড়িয়া উঠানি । অহার অনেক পরে আহিয়া মণিপুর বার্মা যুদ্ধৎ গিয়া আমার আপা বপা আসামর এরে হুরকাং জাগা এহাৎ আহিয়া আশ্রয় নিয়াসিলাগা । যেহান বর্তমানে বাংলাদেশর সিলেট বিভাগ বুলরাং অর্থাৎ, আমি আসি জাগা এহান । অহার আগে আমি মণিপুর রাজ্যৎ বিস্তার ইয়া আসিলাং । আজিত্ত প্রায় দ্বিহৌও(২০০) মারি আগে মণিপুরি মহা রাসলীলার প্রবর্তন করেসিলতা রাজর্ষি শ্রীল ভাগ্যচন্দ্র মহারাজে । গিরক যেপাগা রাসহান করেসিল অহাৎ, রাধাগো তার জিলক ভাগ্যবতীরে দিয়া করেসিল । কিন্তু কৃষ্ণগোর ভারহান আজ্ঞউ নিয়া নুয়ারিসিলা । আজ্ঞউ নানানিয়ে মহারাজে মন্দিরগোর শ্রী কৃষ্ণ মূর্তি অগোরে শ্রীকৃষ্ণ বুলিয়া(ভাবার্থে) আনিয়া রাসহান সৃজেসিল। শ্রী কৃষ্ণর মহারাস লীলা এহান খুব ডাঙর বারো ভক্তিরসামৃত লীলা হান । এহান কাকপক্ষীয়েও দেখানি নাকরের । কিন্তু মহারাজে অহানরে খানি লাম সালকরিয়া মন্ডলী অগো আস্তাগো ফুতিনো বেরাসিল । ফুতিনো বেরাসি মন্ডলী অগোর ভিতরে সখী ভাবে যেতাই হমা পারিসি অতাই হুদ্দা চানা পারেসিলা । বারো আরতা আকগউ হমা নুয়ারেসি। শ্রী কৃষ্ণর মূর্তি অগোরে নিয়াই মণিপুরির পইলাকার রাসহান আরাম্ভ করানি ইসিল । অহার সুত্র ধরিয়ায় আমার মাধবপুরর রাসহান সিজিলহান ।
মাধবপুরে রাসলীলাঃ
যেপাগা মণিপুর যুদ্ধ ইসিল অহাৎ মণিপুরেতো পাল আহান দাবদিয়া বর্তমানে আমি আসি জাগা এহাৎ আহিয়া আশ্রয় নিয়াসিলাগা । অহাত্ত পাল আহান মানু জিংতা ঘাটহার এপারে ঠাই নিয়াসিলাগা । যেহান, এপাগা নগর বুলিয়া আমি চিনরাং বারো আরাক পাল আহান জাগা আহাৎ । এসারে জাগা জাগা করিয়া সিতারাসি । তানুর ভিতরে বামুন শিংলুপ আহানে জাগা আহাৎ গিয়া ঠায় নিয়াসিগা । তানুয়ে যে জাগাহান বাসিছি যেহান শুদ্ধ বারো প্রভুর আরাধনা করানি ইকরের অসারে জাগা আহান । যেহাৎ মাধব মন্দির বারো শ্রী হরি বিগ্রহ থয়া পূজা করানি অকরের অসারে শুদ্ধ জাগা আহান । তথ্যনিয়া আমি হারপিলাং যে, ডাঙর হেনুর সপা আহার তিকগোৎ কাহিয়া তাঙি জাগা বিসারাসি বুলিয়া । ওরে হেনু সপা অহান প্রায় আহউ(১০০) মারি বাঁচিয়া আসিল । এপাগার বুজন গিরিগিথানিরাং আংকরলে সপা এহার সত্যতা সম্পর্কে হারপানি পাররাং । অনেকগই সপা এহান দেখিসি । সপা অহান এপাগা মাধবপুরর বর্তমান ললীতকলা একাডেমিগোর বায়ু কুনসেল অগোৎ আসিল । জাগা এহান বাসলা । যেহাৎ, এপাগা শ্রীকৃষ্ণর রাসলীলা অর ।
মাধবপুর জোড়া মান্ডপঃ
পইলাকা মান্ডব আগো হংকরেসিলা বারো পরে লামসালয়া কাদা কাদা করিয়া হাবিয়ে তিনগো হংকরেসি । ওহাত্ত লামসালয়া পারুয়া লয়া আরাকউ নিয়ামপারা জাগাৎ পুরুহিত(বামুন) দাপা দাপা সিতারাসিলা । মাধবপুরোর মণিপুরি এরে রাসলীলা কেন্দ্র এগোৎ আসেতা তিনগো মান্ডপ । কিন্তু জোড়া মান্ডপ কিদিয়া মাততারাতা ? আমি অনেকগই মনে কররাং যে, হয়ত আগে হুদ্দা দুগো মান্ডব আসিল বুলিয়া এরে মান্ডব অগিরে জোড়া মান্ডব বুলরাং । আসলে এসারেহান নাবে । জোড়া মান্ডব মাতানির পিসেদে যে কারণহানি আমি পেইলাং অহান এসারে, তিনগো মান্ডপ পইলাকাতো আসিল । কিন্তু আগোর লগে আগো কাদা-কাদি সাকেই সাকেই ইয়া আসিল বুলিয়াই এর মান্ডপ অগিরে জোড়া বারো সাকেই মান্ডপ বুলতারা । মাধবপুরে রাস লীলা ঠিক কুরাংতো, কিসারে আরাম্ভ ইসিল অহান আজ্ঞউ হাইহান করিয়া মাতানি হীন । বারো লেরিক লেসুৎওউ অহান স্পষ্ট নাদিয়াসি । লোকমুখে হুনা কথাৎ হারপারাং যে,
আনুমানিক ১৮৫২ খৃষ্টাব্দর দিকে বর্তমান মাধবপুরোর জোড়া মান্ডব এলাকা এহাৎ প্রতি বছর রাস পূর্ণিমার দিন অহাৎ ভগবান শ্রীকৃষ্ণর থেংহার নুপুরর কংকন ধ্বনি হুনিসি । বারো দুরিহাত্ত , লপুকগোর বুজ্ঞত্ত শ্রী কৃষ্ণর মধুর মোহন বাঁশির আওয়াজ হুনেসি । কুঙ্গগই বাহিতারাসাত বুলিয়া চানাৎ গেলেগা হুত্তুমে মনে অরতা আরাকউ খানি দুরি ইসা বাহের, আতের এসারে বুলিয়া । রাতিনঙি এসারে আওয়াজ হুনিয়া মানু ভগবানর নিঙে আবেগ-আপ্লুত ইসিলা। অহার পরেই ভগবান শ্রীহরি হপন আহাৎ জোড়া মান্ডপর বামুন আগোরে হপনে রাসলীলা করানির ইথৌও দিয়াসে । আজিকার মহারাসলীলার সূচনা অরে সময়েতো । অহাত্ত অকরিয়া বিষ্ণুপ্রিয়া মণিপুরি শ্রীকৃষ্ণর মহারাসো রসে আমার এরে জোড়া মান্ডবগি ।
0 Comment "মাধবপুরোর রাসোরসে - রনি সিংহ (নিংশিং চে - ২০১৬)"
একটি মন্তব্য পোস্ট করুন